Зэсийн үнэ өсөж, зах зээл нийлүүлэлтийн эрсдэлийг ажиглаж байна

Лондонгийн металлын бирж (LME)-ийн гурван сарын хугацаатай зэсийн фьючерс үнэ аравдугаар сарын 13-ны өдрийн арилжаагаар тонн тутамдаа 14,636.50 ам.долларт хүрч, өмнөх өдрөөс 0.1%-аар өссөн байна. Зах зээлд нийлүүлэлтийн эрсдэл нэмэгдэж буй нь үнийг дэмжих гол хүчин зүйл болж байгаа юм.

Тодруулбал, Чилийн дэлхийн томоохон зэсийн ордуудын нэг болох El Teniente уурхайд үйл ажиллагааны хэсэгчилсэн саатал үүссэн бол Centinela уурхайн ажилчидтай хийж буй цалин, хөдөлмөрийн нөхцлийн хэлэлцээний үр дүн тодорхойгүй хэвээр байна. Ийм нөхцөл байдал нь дэлхийн зах зээл дэх зэсийн нийлүүлэлтэд анхаарал хандуулах шалтгаан болжээ.

Мөн Лондоны металлын биржийн агуулах дахь зэсийн нөөц буурсан нь ойрын хугацаанд нийлүүлэлт харьцангуй чангарсныг илтгэж байна. Нөөцийн бууралт нь худалдан авагчдын эрэлт нийлүүлэлтээс давж эхэлсний дохио гэж зах зээл үздэг бөгөөд энэ нь үнийн өсөлтийг дэмжих хүчин зүйл болж байна.

Гэсэн хэдий ч зарим шинжээч зэсийн үнийн бүх өсөлтийг зөвхөн уурхайн тасалдалтай холбон тайлбарлах боломжгүй гэж үзэж байна. Санхүүгийн хөрөнгө оруулагчдын идэвх, фьючерс зах зээл дэх арилжааны байр суурийн өөрчлөлт зэрэг хүчин зүйлс мөн үнэд нөлөөлж байгааг онцолжээ.

Монгол Улсын хувьд зэсийн үнэ өндөр түвшинд хадгалагдах нь экспортын орлого, валютын урсгал, төсвийн орлогод эерэг нөлөө үзүүлэх боломжтой. Гэвч эцсийн үр ашиг нь олборлолтын хэмжээ, баяжмалын экспортын нөхцөл, борлуулалтын гэрээний үнээс хамаарах юм.

Яагаад чухал вэ?

Зэс нь Монголын экспортын гол бүтээгдэхүүний нэг бөгөөд үнийн өсөлт нь экспортын орлого, төлбөрийн тэнцэл, төгрөгийн ханш болон улсын төсвийн орлогод шууд нөлөөлдөг. Иймээс олон улсын зах зээл дэх зэсийн үнийн хөдөлгөөн дотоодын эдийн засагт өндөр ач холбогдолтой юм.

Эх сурвалж: Business Recorder, London Metal Exchange